Me in focus

تاج وصلني من المدونة صاحبتي بنت أبيها ..وطبعا مينفعش أزعلها ومردش مع أني مش بحب التاجات دي بس مش مشكله نبتدي بأه الأسئله

قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟

هو الواحد مش ضليع في التاريخ او بمعنى اصح مش قاري اصلا بس يمكن يكون العصر الروماني اعتقد هو ده العصر اللي ظهرت فيه المسيحية ومرت فيه السيده مريم من مصر كان نفسي استناها في سيناء وقابلها وأكمل معاها الرحلة

أول أولوية فى حياتك عيلتك ولا شغلك ولا اصحابك؟

أنا شغلي هو مذاكرتي حاليا وهو صاحب الأولوية في حياتي دايما ودي حاجه مش مريحه في حاجات تاني برده مهمه

ايه أكتر حاجة بتحبها فى رمضان ؟

فانوس رمضان ..أغاني رمضان ..قراية القران بتبقى حلوة قوي

أجمل فطار ممكن تفطره؟

أجمل فطار مع ناس قلوبها حلوة ..كلنا بنحب بعض..اللمة يعني

لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟

بما اني الأخت الكبيره فأنا حاكم على العيال الغلابه اخواتي بضبط نفسي كتير متلبسة بالدكتاتورية لأني بخاف عليهم و لأن الديموقراطية حاجة ما عيشنهاش في الحياة .. بس باخد بالي ساعات كتير بعد ما أزعق و أقول لأ مينفعش لازم كده ...ارجع أقول خليهم يجربوا قدام عيني أحسن من ورا ضهري كده يعني أسيب شوية أوكسجين-بعد ما ماما تتحايل عليا-...عايزه تعرفي انا حاكم عادل اسأليهم ولا حد هيقدر يتكلم هو ده العدل أساس الملك

مين أكتر اعلامى مصرى بتحترمه ؟

بصفتي متابعة غير جيدة لوسائل الاعلام مقدرش احكم بس كل اللي اقدر اقوله ان الاعلام بقى ورده في جيب جاكت النظام الحاكم ..حتى مدونتي دي باعتبارها من وسائل الاعلام ورده يعني

لو ممكن تشتغل شغلانة تانية كنت تتمنى تبقى ايه ؟؟

شغلانة تانية..ممكن نقول دراسة تانية اداب قسم لغة عربية ..فلسفة ..ممكن..اعلام قسم صحافة.برده ممكن ..

ايه تانى بلد تتمنى تعيش فيها بعد مصر ؟؟

اليابان حتى الواحد يتفرج على كونان من غير ترجمة ..

اوصف ترتيبات اجمل فرح ممكن تحضره ؟

عروسة وعريس فاهمين بعض ..دماغهم شبه بعض ..ورد في كل حته ..مزيكا هاديه بس من غير أغاني بيتهوفن موتسارت ياني باخ ..معازيم محترمين وقاعدين ماكنهم يسمعوا المزيكا بس ..هيحصل في الأحلام ان شاء الله

بتراعى كلام الناس والقيل والقال ؟؟ ولو اه او لا قول ليه ؟

هو الواحد بيتصرف على طبيعته على راي كابتن جاك خليك واضح وصريح ودايما على طبيعتك لو حد فهمني غلط لازم أوضح له.. المشكله بأه في الناس اللي عايزه تشوفك غلط على تطول وما يعجبهاش العجب بتحرق دمي بس الواحد مفروض يكبر دماغه

صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟

طبعا سعيده ...سميها العوده الى أحضان الطبيعة ..التخلص من عبث الانسان احسن حاجة بلا موجات كهرومغناطيسية ..بلا تلوث ....الطبيعة اللي خلقها ربنا يا سلام

السعادة هى ..؟

ألاقي وأفهمها نفسي ... طريقي في الدنيا -يارب-... هي دي السعادة

عندك أمل ؟ اسبابك ؟

عندي أمل علشان كده عايشة لما بيروح الأمل الواحد بيفكر يستقيل من الحياة بس بما انه ماينفعش يبقى لازم أكمل وما دام مكمل يبقى لازم علشان الأمل ..حد فهم حاجه؟؟

لما بتحب تهرب من كل شئ بتروح فين ؟؟

للسرير

امتى اول مرة خدت فيها نفس طويل وقلت ياااه انا فعلا كبرت ؟؟

ولا مرة حضرتك ..لسه عيلة وهبلة عادي يعني

بتشرب سجاير ؟؟ وايه شعورك اما ست او راجل بيشرب سجاير ؟ ليه ؟

بحشش بس وباخد أمفيتامين ..حد عايز ؟؟ شعوري ايه لما بلاقي حد بيشرب سجاير - أنا شايفه كده يعني -السجاير مش هي المشكة اطلاقا...المشكلة هي اللي خلتهم يشربوا سجاير

بتعرف ايدك اليمين من الشمال ازاى ؟؟

عندي علامة في ايدي الشمال معلمني لحسن اتوه ولا حاجة

ايه اكتر الة موسيقية بتحبها ؟

أنا بحب المزيكا وكل حاجة ليها حلاوتها ..لو هاختار يبقى العود

فى رأيك ليه الذوق والنخوة اتعدموا ؟

ما نعدموش انت مش واخده بالك بس

ايه الحاجة اللى لو حصلت لك حتبقى سعيد اوى ؟

اخرج مع اصحابي ا..نطلع رحله....اروح للبحر كل دي حاجات بتبسطني قوي

تحب يبقى عندك ارض زراعية ولااجنس عربيات ولاكام عمارة ولافلوس فى البنك ؟

ارض زراعية اطلع اجري وسطها

البحر ولا النيل ؟

البحر طبعا بالنسبة لي اجمل حاجة خلقها ربنا

مركب ولا طيارة ؟

مركب ..عباره السلام

مجنون ولا عاقل ؟

مجنون

تقرا كتاب ولا تتفرج على فيلم ؟

الاتنين احلى من بعض

تمرر التاج ده لمين ؟

لاي حد عايزه ..أبو تريكه ينفع؟؟