معرض القاهرة الدولي للكتاب 2010


يوم عمري ما أقدر أنساه أبدا وأول رحلة أطلعها مع نقابة الأطباء وإن شاء الله مش اخر رحلة ,الجو كان برد قارس وصلنا حوالي  الساعة الحادية عشر والثلث وفجعنا لما قالولنا مفيش دخول لحد ما تخلص صلاة الجمعة , طبعا إجراء أمني عقيم غبي لأنه مش بس لغى الدخول وخلا الاف يقفوا بره المعرض في البرد والمطر-احنا رجعنا الأتوبيس-لكن كمان منع بيع التذاكر لحد الساعة واحدة وتلت ظهرا فخلا الدنيا زحام شديد خصوصا انه البوابة 9 وعشرة وحداشر اللي كنا واقفين عندها بتدخل واحد واحد  ومنفذين لبيع التذاكر كان منظرهم مرعب تقدر تسميه مفرمه بشريه اللي يدخل لو خرج هيبقى شبه عصير الطماطم اللي خارج من الخلاط, المهم بعد معاناه استمرت ساعة الا تلت تمكنا بأعجوبة من فض الأسوار البشرية المقامة حول المعرض والنط فوق عربيات الأمن المركزي وتجاوز الأسوار
دي صور منافذ بيع التذاكر الاول والتاني
    , الحديدية ودخول معرض الكتاب,معقولة أنا وصلت ودخلت ياه مش مصدقه عموما حرمت اروح المعرض يوم الجمعة وانتوا كمان اوعوا تروحوا الجمعة وعايزه اقول للحكومة فضحتونا وأسأتوا لسمعة مصر  بتنظيمكم الغبي والأجانب واقفيين معانا يتفرجوا على المعاناه اللي احنا عايشين فيها كل حايتنا طوابير والله مفروض يعملوا كورسات لتعليم وقفة الطابور وكمان كيفية الحفاظ على الاعصاب والإستفادة من وقت الطابور يعني مكن تقعد تصور زي كده وتستفيد من الوقت أو تاخد كتاب تقراه وانت واقف في الطابور وهكذا وأكيد الحكومة هتمول المشروع ده نكاية في الشعب الغلبان عموما الواحد كان عايز يتبسط اليوم ده ويشتري الكتب اللي في دماغه  علشان كده لازم ينسى كل اللي حصل وعلى رأ ي تيمون وبمبة العالميين النفسويين الشهريين هكونا متاتا يعني للي مش عارف اضربها طبنجه , انسى الماضي اللي يغيظ وركز في الكتب اللي هتبسطك وتفهمك الحل ايه لكل المهاترات اللي احنا عايشنها
دخلت دار ميريت  والشروق والهلال والأهرام ومكتبة جرير والعبيكان واشتريت يوتيبيا أحمد خالد توفيق,ماذا حدث للمصريين جلال أمين وحجرتان وصالة أبراهيم أصلان , لماذا لايثور المصريون علاء الأسواني وشوية كتب تانيين ...وقابلنا الدكتور أيمن نور سأله شاب كده الحمد لله ان وشه مش طالع في الفيديو-طبعا عارفين ليه- عن القيام بثورة  من أجل التغييرفجاوبه الدكتور نور بأن الحل السلمي هو الحل الوحيد والثورة تكون عن طريق صندوق الاقتراع فرد عليه الشاب  الحل السلمي بعيد جدا فقاله دكتور نور البلد مش حمل تجربة مراهقة , فسأله الشاب طيب الهجرة رد دكتور نور الهجره يعني انت بتحرم بلدك منك...معاه حق والله عموما متعة القراءة لا تضاهيها متعة يعني زي ما قال العقاد لست أهوى القراءه لأكتب ولا  اهوى القراءة لأزداد عمرا في تقدير الحساب, وإنما أهوى القراءه لان عندي حياة واحدة في هذه الدنيا وحياة واحدة لا تكفيني ,ولا تحرك مافي ضميري من بواعث الحركة, والقراءة دون غيرها,هي التي تعطي أكثر من حياة في مدى عمر الإنسان الواحد, لأنها تزيد هذه الحياة من ناحية العمق, وإن كانت لا تزيدها بمقدار الحساب,تمنياتي لكم حياة عميقة قوي بس اوعوا تغرقوا فيها ... 



0 comments:

Back to Home Back to Top my fingerprint. Theme ligneous by pure-essence.net. Bloggerized by Chica Blogger.