رحلة معرض الكتاب

رحلة رحله رحله خلت يومنا أحلى يوم الأحد الموافق 3-2-2008
غادرت شيماء أرض الوطن وشدت الرحال الى معرض القاهرة الدولي للكتاب كنت طالعه الرحله مع الإخوان مع العلم بالخلاف اللي بيني وبينهم لكن الخلاف لا يمنع التواصل .. واحنا رايحين كانوا عاملين مسابقات طبعا أسئله تاريخية ..وحضرتنا ثقافتي التاريخية- خصوصا التاريخ الاسلامي -ضحلة ..على العموم أنا كنت مريحة على الكرسي الفاضي اللي جنبي ..سرحت في نفوري من الماضي ربما لأن نظرتي للماضي على أنه تشدق بعبقرية العرب التي لا مكان لها على أرض الواقع
ربما لأن الفتى من قـال هـا أنـذا*** ليس الفتى من يقول كان أبي ...
...اشترت كتب حلوه كتيره ..مع إني ملفتش المعرض زي كل مره ...الصحه بأه نعمل ايه هدونا حيلنا الهي يهد حيلهم
اشتريت ايه ؟؟ يوسف إدريس أرخص ليالي واخر الدنيا ..ودكتور فيل
love smart
و شخصية مصر ..رباعيات صلاح جاهين ..الأعمال الكاملة لأحمد مطر ..كتاب صغنون لعبلة سرور اسمه حكمة الحياه مقتطفات من روايات نجيب محفوظ ..أحمد منصور حصار الفلوجة ..المهم اخر الرحلة دخلت دار الشروق لقيت كتب المدونات خلصت اهيء اهيء ..اشتريت كتاب لفهمي هويدي وقابلت أحمد منصور كان بيشتري دار الشروق تقريبا ..خليته كتب لي إهداء على الكتاب بتاعه حصار الفلوجه
خلاص كده أنا تعبت قوي ..لذلك أعلنت الرحيل وانتهت الرحلة بصعودي للأتوبيس ..قعدنا نتكلم عن الكتب اللي اشتريناها وبعدين نمت تاني بس المرة دي بجد مش هزار زي وأنا رايحة الرحلة صحيت من النوم لقيت فاضل ربع ساعة وأصل بأمان لأرض الوطن ..جايلك يابني سويف جايلك بس انت ماتسبنيش استنى وماتجيش....... ...